Hamas chief Sinwar-a'n Hezbollah hruaitu lawmthu hrilh

Palestinian firfiak pawl, Hamas hotu lu ber, Yehya Sinwar chuan Lebanon-a helpawl, Hezbollah hotu Sayyed Hassan Nasrallah hnenah Israel nen an inbeih meknaah an pawl an thlawp ṭhat avangin lawmthu a hrilh.

Iran thlawp, Hezbollah pawl hian Israel leh Hamas inkara nikum October thla aṭanga indona a thlen hnuah,Hamas an thlawpna lantirin Lebanon-Israel ramri aṭangin Israel lam hi an lo bei ve reng a ni. Hei hi Palestinian mite an thlawpna a lantirna niin an sawi.

Hezbollah broadcaster, al-Manar chuan kumin August thlaa Hamas hruaitu thar atana ruat, Yehya Sinwar-a'n an pawl hotu hnena lawmthu a hrilh thu hi nimin ah a tarlang a ni.

October 7, 2023-a Hamas ten Israel chhim lam an beih hnu aṭang khan Sinwar hi vantlang hmuhah a inlan tawh lo a, mahse Gaza-a tunnel-ah biruin, Israel nena an indo meknaah an pawl tan ro a rel ṭhin nia sawi a ni. A birukna hmun aṭang vek hian Thawhlehni khan Algeria President atana an thlan nawn, Abdulmadjid Tebboune hnenah lawmpuina a lo thawn tawh bawk.

Hamas-in Israel rawtna pawm dawn lo

Gaza Strip-a Israel-Hamas indona thleng mek tihtawp a nih theihna tura inbiakna neih chu a la hlawhtling thei lo a, rawtna hrang hrang siamte chu pawl pahnihte hian an la pawm dun thei lo zel a ni.

Tun hnaia Israel-in Hamas-ten Israel an beih ṭuma an mi man, tun thlenga an la hrente chhuah an nih chuan Hamas hotu, Yehya Sinwar chu Gaza aṭangin him taka a chhuah a phalsak ang tia an rawt chu Hamas lam chuan an pawm dawn lo tih an sawi.

Israel hren mekte chhuah an nih theihna atana palai hna thawktu, Gal Hirsch chuan Hamas in an mi hrente an chhuah a nih chuan Sinwar leh a chhungte bakah, a hnung zuitu dangte chu Gaza aṭanga him taka chhuah tir an ni ang, a ti. Mahse Hamas lam chuan an hruaitu hian a hma a sial lo a, ama himna tur ringawta Gaza chhuahsan tumna a nei lo tih an sawi bawk.

Israel intelligence unit hotuin banna theh lut

Israel intelligence unit hotu, brigadier general Yossi Sariel chuan October 7, 2023-a Hamas firfiakten an ram bei a, civil mi 1,200 chuang an thah chungchangah, he pawikhawihna rapthlak tak an dan loh avangin a hna aṭangin banna a thehlut a, Israel mipuite hnena ngaihdam dilna a ziak tel bawk.

Israel media lamin Sariel-a banna lehkha thehluh copy an tih chhuahah, Unit 8200 commander hian mipuite venghim tura an mawhphurhna pek an hlen chhuah zawh loh avanga ngaihdam a dilna thu hi a ziak tel a ni. Unit 8200 hi an ram beih tumte lo chhui leh lo zirchian kawnga mawhphurtu an ni.

Hamas te pawikhawihna thlen kaihhnawihah hian kumin April thla khan Israel military intelligence directorate major general Aharon Haliva pawhin a banna a lo thehlut tawh bawk.