Myanmar ramah tuilian vangin mi 19 thi

Myanmar ram khawpui, Naypyidaw-ah ruah sur nasa avangin tui a lian a, tuilian vang hian mi 19 an thi a, mi 3,600 chu lawng hmangin hmun him lamah thiar chhuah a ni tih national fire service chuan a sawi.

Ningani khan Naypyidaw leh a chhehvel, square km 162 a zau chu tui lianin a chim a, hei bakah an ram khawpui lian pahnihna, Mandalay-ah pawh sq km 366 vela zau chu tuiin a chim bawk.

Fire Department chuan tuilianin a nghawng, hmun 30-a mi 3,602 te chu chhanchhuah an ni tih sawiin, mi tam tak chu an in tuiin a chim avangin chhanchhuah hun nghakin in chungah te an lo awm niin an tarlang.

Myanmar sipaiten kum 2021-a civil sorkar thuneihna an hnehchhuh hnuah an ram chhung buaina hian ziaawm lam a la pan thei lo. Sipaite leh sipai sorkar dodaltute an la inbei reng a, mi tam tak chu himna zawngin ram dangah an tlanchhia a, ram chhunga awmte zinga tam tak pawh chhawmdawl ngaiin an awm. International Committee of the Red Cross chuan Myanmar mipui maktaduai 55 zinga hmun thuma ṭhena hmun khat chu chhawmdawl an ngai a, hetih lai hian sipai sorkar chuan hmun ṭhenkhatah chhawmdawl hna thawktu kal a phalsak lo a ni.