Kum 50 hnuah US leh Cuba president-te'n meeting nei
Kum 50 hnuah a ṭum khatna atan US leh Cuba President-te chu 7th Summit of the Americas neihna hmun, Panama-ah hmaichhanah an inkawm.
US President Barack Obama leh Cuba President Raul Castro-te hian summit neih karah meeting an nei a, Cuba hi summit-a a tel vawi khatna a ni.
Ram pahnih hruaitute chuan an ram inkar boruak ṭha lo awmte siamṭha a, inlaichinna ṭha neih an duh thu an sawi.
Cuba hruaitu Castro chuan a kaihhruai sorkar chu US nena an inkar boruak siamṭha turin a inhawng a, human rights leh press freedom chungchangte pawh sawi ho turin a inhawng vek a ni, a ti. Castro chuan, "Inzahtawn taka thiltih chuan engkim a sawi ho theih vek ka ring a ni, inrem vek thei lo mah ila thil ṭhenkhatah chuan inremna kan siam thei ngei ang," tiin a sawi.
US President Obama pawhin boruak ṭha zawk siam turin kawng an zawh mek tih a sawi a, ram pahnihte inkar boruak tichhetu inhriatthiam lohna an neih ṭhinte chu dahṭhat a hun tawh a ni, a ti. Obama chuan Castro-a'n inhawng taka indawr a duh chu lawmawm a tih thu a sawi a, ram pahnihte chuan boruak ṭha zawk an nei chho ngei ang, a ti. Hruaitu pahnihte hian Panama City-a inbiakna an neih hma hian telephone-in an lo inbe tawh bawk.
Thla thum kalta chhung khan US leh Cuba hian an inkar boruak siamṭhat dan kawng zawngin ṭum thum inbiakna an lo nei tawh a ni.
Castro nena meeting an neih zawh hnua chanchin thar lakhawmtute a kawmnaah, Obama chuan Cuba chu US himna atana hlauhawm a ni lo tih a sawi a, Cuba nena cold war an neih chu a zo tawh a ni, a ti. Hemirual hian State Sponspors of Terrorism List aṭang hian Cuba paih a nih dawn leh dawn loh chungchangah thutlukna a la siam lo tih a sawi.
US State Department chuan Cuba ram dinhmunte a zirchian hnuah, President hnenah hian terrorism list aṭanga paih tura rawtna a thlen a ni. State Depatment chuan list-a Cuba a awm chhan hi Colombia helpawl lian ber, Revolutionary Armed Forces of Colombia (FARC) a thlawp vang niin a sawi.