Kenya-in UN hnenah Dadaab camp khar turin hriattir

Kenya Deputy President William Ruto chuan an ram hmarchhak lam, Dadaab-a United Nations-in refugee camp a siam chu tihtawp turin a hrilh. He hmuna Somalia mi 500,000 chuang awmte chu hmun dangah awmtir turin a hrilh bawk.

Dadaab refugee camp hi Somalia ramri bul a awm a ni a, Africa-a refugee camp lian ber a ni.

April 2 khan Somalia helpawl, al-Shabab Islamist movement chuan Kenya rama Garissa khuaah university beiin, zirlai 148 an that a ni. He pawikhawihna thleng vang hian Kenya sorkar chuan Somalia raltlante awmna hmun hi khar tur­in a hriattir ta nia rin a ni.

Kenya rama UN refugee agency UNHCR hotu chuan camp khar tura hriattirna hi official-in an la dawng lo, a ti.

Ruto chuan UNHCR hian Dadaab camp khar tur hian UNHCR hi thla thum hun pek an ni a, he camp-a awmte chu an ram lama thawn kir dan ngaihtuah sak turin a ti. Hun pek chhunga sawnchhuah an nih loh chuan Kenya sorkarin hma a la dawn tih a sawi bawk.

Kum 1991 khan Somalia tualchhung buaina thleng vanga raltlante awmna turin Dadaab refugee camp hi buatsaih a ni a, he hmuna cheng ṭhenkhat chu kum 20 chuangte an awm tawh a ni. Refugee camp huam chhungah hian dawr, hotel leh factory-te pawh a awm vek a ni.

Kenya MP-te chuan Dadaab camp-ah hian Somalia firfiakte an biru fo ṭhin niin an sawi.