Iran hi rin ngam tur a ni lo: Netanyahu

Israel Prime Minister Benjamin Netanyahu chuan khawthlang ramte leh Iran ramin nuclear deal siam an tum chu sawisel nawn lehin, Iran chu rin ngam tur a ni lo, a ti.

P6+1 leh Iran aiawhte hian hun rei tak inbiakna an neih hnuah inremna siamna tur duan hi an remti thei a, June thla tawpah inremna puitling siam hman an tum a ni. Hei hi sawiselin, Netanyahu chuan inremna an siam chuan khawvela firfiak ram hmahruaitu, Iran tan nuclear bomb siamna kawng a hawnsak zawk dawn niin a sawi.

"Engvangin he ram hi kan rin ngam ang," tiin Netanyahu chuan a sawi a, Iran chuan a nuclear ralthuam siamna hmunte chu a tichhe lo a, a humhalh zawk zel a ni, a ti. Khawthlang ram aiawhte'n Iran nuclear site an endikte chu an uluk tawk lo hle niin a sawi a, "Tunah phei chuan endiktu pawh an awm tawh lo a ni," a ti.

June thlaa Iran nuclear deal an ziahfel chuan, Iran chu khawvel chuan ram pangngai, venthawn ngai tawh lo angah an ngaih nghal hmai a hlauhthawn thu Israel PM chuan a sawi. Inremna siampui mah se, Iran chu Israel ram himna atan a la hlauhawm zawk zel dawn a ni, a ti.