Bangladesh-in Jamaat-e-Islami hruaitu a khaihlum

Bangladesh sorkar chuan kum 1971-a Pakistan aṭanga independence an sual laia mahni mihring puite chunga pawikhawihna nasa tak thlentu, Jamaat-e-Islami hruaitu Mohammad Qamaruzzaman a khaihlum.

Mohammad Qamaruzzaman hi eptu pawl, Jamaat-e-Islami assistant secretary general a ni a, thi tura thiam loh chantir a nih hnuah pawh President hnenah ngaihdam a dil duh lo a ni.

1971 independence war laia pawikhawihna thlen chungchang chhui tura kum li liamtaa tribunal din anih hnuah thiam loh chang khaihlum pahnihna a ni. Kum 2013 December thla khan Jamaat-e-Islami assistant secretary Abul Quader Mollah chu indo laia Bangladesh mi tam tak thihna thlenga mawhphurtua puh a nih vangin khaihlum a lo ni tawh bawk.

Kar kalta Inrinni zan khan Qamaruzzaman hi a tanna, Dhaka Central jail-ah khaihlum a ni a, tihhlum a nih hma hian a chhungte'n an tlawh a ni. Report chuan khaihlum a nih hma hian Qamaruzzaman-a thlan hi Dhaka khaw daia an chhungkaw ramah laih sa vek a nih tawh niin an sawi.