Yemen aṭangin missile hmangin Israel kap

Yemen aṭangin Pathianni, September 15 khan hypersonic missile hmangin Israel kah a ni a, Tel Aviv khawpui bula Lod area-a ram ruakah tlain kangmei a chhuak zui a ni.

Missile-a kah an nih avang hian Tel Aviv leh Israel ram laili, Ben Gurion international airport-ah siren tih rik a ni a, mipuite chu inhumhimna zawngin an tlanchhe hlawm a ni. Thil tih chhiat a nei lo a, thi leh hliam pawh an awm lo niin airport thuneitute chuan an sawi a, flight service pawh a pangngaiin a kal chhunzawm a ni.

Israel sipaite chuan thuchhuah siamin, an ram beihna tura khawchhak lam aṭanga surface-to-surface kah chu ram ruakah a tla a, thil tihchhiat a nei lo tih an sawi. Israel emergency service hotu, Magen David Adom chuan an hmelmate beihna vang ni loin, siren rik vanga himna zawnga an tlanchhiatna lamah mi pakuain hliam tenau an tuar tih a sawi.

Yemen helpawl, Houthi chuan missile hi an kah a ni tih an sawi a, an pawl news agency, SAba chuan Israel defence system chuan an missile chu a lo kap thla thei lo a, hei vang hian kangmei pawh hi a chhuak zui ta niin an sawi. Houthi media official, Nasaruddin Amer chuan hei hi a bul ṭanna chauh a ni tih a sawi bawk.

Gaza Strip-a Israel leh Hamas te indo hnuah, Houthi hian Hamas te an thlawpna lantirin Israel hi ṭum eng emaw zat an kap tawh a ni. An missile tam zawk hi Israel lam chuan an lo kahthlak sak a, mahse March thla khan Red Sea port-a ram ruak ah missile pakhatin a kap fuh a ni. July thla khan Houthi drone chuan Tel Aviv beiin, mi pakhat a thi a, midang pali an hliam. He inbeihna hi ram pawn lam aṭanga drone hmanga Tel Aviv beih a nihna hmasa ber niin, Israel chuan na takin a chhang let a, Yemen-a Hodeidah port beiin, mi paruk an thi a, mi 80 an hliam bawk a ni.

Israel sipaite chuan nimin vek han Lebanon aṭangin Israel bei turin projectile 40 kah chhuah a ni a, mahse hengte hi kahthlak niin, a ṭhen chu ram ruakah an tla tih an sawi a, hliam an awm lo tiin an tarlang.