Myanmar-ah tuilian vangin mi 74 thi; Sipai sorkarin ramdangte ṭanpuina a dil

Myanmar ramah tuilian vangin mi 74 an thi tawh a, Myanmar sipai sorkar chuan a tihdan phung ang lo takin, thlipui tleh leh tuilian vanga an ramin chhiatna an tawh mekah hian ramdangte puihna a dil tawh a ni.

Global New Light of Myanmar chuan typhoon Yagi tlehin a ken tel, ruah sur nasa tak avanga tuilian thlengah an ramah mi 74 thi tawhin, chin hriat lohin mi 89 an awm mek tih a sawi. Tuilian hian chenna in 65,000 chuang, dam panga leh pagoda pali a ti chhia a, sorkar chuan tuilian tuarte awmna turin relief camp 82 a siam tawh niin sorkar media chuan a tarlang.

United Nations Office for the Coordination of Humanitarian Affairs (OCHA) chuan tuilian hi Mandalay, Magway, leh Bago bialin an tuar nasa zual niin a sawi a, hei bakah an ram khawchhak leh chhim lam bial, Shan State, Mon State, Kayah State, leh Kayin State te pawh a nghawng tel bawk.

Myanmar sipai hotu, senior general Min Aung Hlaing chuan sorkar official-te chu an ramin harsatna a tawh mekah ram dangte hnena puihna dil turin a hriattir. Hetih lai hian chhawmdawl hna thawktu pawl tam tak chuan sipai sorkarin khuahkhirhna a siam avangin tuilenna bial hmun ṭhenkhatah chuan chhawmdawl hna hi an thawk thei lo niin an sawi thung.