Philippines president-in US nena thawhdunna titawp

Philippines president Rodrigo Duterte chuan US nena defence lama an thawhdunna, 'Visiting Forces Agreement (VFA)' chu a tihtawp thu Manila-a US Embassy hnenah lehkha thawnin a hriattir.

Ram pahnih ten kum 20 chuang an lo kal pui tawh, VFA tihtawp a nihna lehkha chu Duterte hian an ram foreign affairs chief hnenah thawnin, an ram khawpui Manila-a US Embassy-ah lehkha chu pek a ni ta a ni. Ram pahnih ten inremna an sawi zui loh chuan VFA tih tawpna hi ni 180 hnuah hman ṭan chauh a ni ang.

Hemi chungchang hi US Defense Secretary Mark Esper chuan pawi a tih thu leh, Philippines ram chuan kawng dik lo a zawh mek thu a sawi. US leh a thawhpuite chuan Asia biala 'international rules of order' hmangin dik lo taka che, China chu an do let mek thu Mark chuan a sawi a, hetih laia Philippines ramin defence lama thawhdunna a titawp ta mai hi pawi a tih thu a sawi bawk. 

Duterte-a'n VFA tih­tawpna thupek a chhuah chhan hi thla hluia US-in Philippines Police General hlui leh Senator nilai Ronald Dela Rosa visa a tihtawpsak vang niin thuthar thehdarhtute chuan an sawi. Duterte chuan US-in thlakhat chhunga Ronald Dela Rosa visa an tihnun sak leh loh chuan kum 1998-a US nena 'Visiting Forces Agreement (VFA)' an ziah aṭanga inhnuhdawhah a vau zui a ni.