Brazil President duh lohna lantirin nawrh huaihawt

Brazil Prsident Dilma Rousseff bang tura phutin Pathianni khan Brazil khawpui hrang hrangah nawrh huaihawt a ni.

Nawrh huaihawtna lian ber, Rio de Janeiro-ah chuan mi tam tak an pungkhawm a, mipui pungkhawmte hian an hnam puanzar rawng, thawmhnaw eng leh hring-te inbelin, 'Dilma bang rawh se' tih thuziakte an keng a ni.

President Rousseff-i hi state-run oil company, Petrobas eiruk thubuai leh a kaihhruai party hotute inhnamhnawiha puh a nih vang leh, an ram economy dinhmun tlahniam zel avangin bang turin an phut a, an ram hruaitu thlak a hun tawh nia an ngaih thu an tarlang.

Pathiannia nawrh huaihawt hi thla khat chhunga President Rousseff ban phuta nawrh huaihawt a nih ṭum hnihna a ni.

Brazil President hlui zingah Fernando Collar de Mello chu ama unaupa ngeiin eirua a puh avangin paihthlak a ni tawh a ni. Mahse legal expert-te chuan Rousseff-i hi paihthla tur chuan dik lo taka thiltihnaa amah ngei a inhnamhnawih a ni tih finfiahna ṭha tak a awm a ngai ang, an ti.

State oil company, Petrobras contract hmuh theihna atan hian thamna bakah fund chi hrang hrang dollar maktaduai 800 vel pek niin prosecutor-te'n an sawi. Heng eiruk leh thamna thlen lai hian President Rousseff-i hi Petrobras chairwoman a ni.

Nikum October-a Brazil President thlanna neihah hian Rousseff-i hi thlan nawn niin, vote tla aṭangin 50% a hmu pha a, mahse thla hmasaa a laka lungawi lohna lantir a nih aṭang khan mipuite ngaihdan lakah a dinhmun a tlahniam chak hle.

Kar kalta Inrinnia Datafolha-in mipui ngaihdan a lakah, Brazil mipui hmun lia ṭhena hmun thum chuan President duh lohna lantira nawrh huaihawt hi an thlawp a ni. Mipuite chuan President chu a nihna aṭang paihthlak kher ngai loa banna thehlut mai turin an ti.

Rousseff-i hi a bang a nih pawhin amah thlaktu tur chu Vice President Michel Temer a ni a, mahse Temer-a party centrist PMDB party hruaitu eng emaw zat chu Petrobras eiruk thubuaiah hian inhnamhnawiha puh an ni bawk.