Yemen president-in a deputy tur a ruat

Saudi Arabia rama himna zawnga tlanchhe mek, Yemen President Abd-Rabbu Mansour Hadi chuan a prime minister hlui, Khaledh Bahah chu vice president atan a ruat.

Baha hi Yemen ramah a lar hle a, an rama party hrang hrang inkara boruak ṭha lo awm mek siamṭhatna kawngah a ṭangkai thei dawna rin a ni.

Hetihlai hian President Hadi kaihhruai sorkar paihthlak tumtu, Houthi leh sorkar sipaite chu an la inbei chhunzawm reng a, Saudi Arabia kaihhruaiin Sunni Arab-te chuan kar hnih chuang Houthi ho lakah beihpui an thlak tawh bawk.

United Nations Secretary-General Ban Ki-moon chuan Yemen tualchhung indona thleng mek chu titawp a, inremna kawng zawnga inbiakna nei thuai tura a duh thu a sawi.

Ban chuan, "Yemen-ah hian Houthi-te hian tharum hmangin an ram thunun an tum a, hei hi pawm theih a ni ngai lo ang. Hemi rual hian sipaite chetdan pawh enfiah a ngai a ni," a ti.

UN chuan nikum September thlaa Houthi helte'n Yemen khawpui, Sanaa an lak aṭang khan buaina thleng vangin mi 600 an thi tawh a, mi 2,200 in hliam tuarin mi 100,000 chu an tlanchhe tawh niin a tarlang.