IS-te'n Autralia airport website an hack

Islamic State (IS) firfiakte'n nimin khan Australia airport website an hack sak a, firfiak pawl thlawpna thu ziak an dah.

Police-te chuan Tasmania, Hobart Inter­national Aiport web host chu khawih an tum ber nia a lan thu an sawi a, hlauhthawn tur thil dang a awm lo niin an sawi.

Tasmania police chuan thuchhuah siamin, airport website-ah hian IS firfiak pawl thlawpna thu dah a ni tih an sawi a, nimin khan IT service provider-te nen website security hi an enfiah nghal bawk. Australia hi US kaihhruaia Iraq-a IS laka ṭangrual pawlte'n beihpui an thlaknaah a tel.

IS firfiakte hian video tichhuak thar lehin, hetah hian Iraq rama Assyrian khawpui, Nimrud-a hmanlai thil hlu an tihchhiat lai an tilang. Firfiakte hian kum 3,000 vela upa thil siam hlu tak takte chu an hal darh vek a, an thuneihna huam chhunga hmanlai thil hlu, milim leh thildang awmte chu tihchhiat vekah an vau zui bawk.