Russia-in Iran hnena missile system hralh khapna titawp
Russia chuan Iran hnena S-300 anti-aircraft missile system hralh a khapna chu Thawhṭanni khan a hlip.
Russia parliament, Kremlin press service chuan thuchhuah siamin, President Vladimir Putin chuan missile system hralh khapna hlihna tur hi a ziak fel tawh tih a sawi.
Tun thla tir lam khan Iran leh world power ram paruk, Russia telnate chuan Iran nuclear program chungchangah inremna siam an lo remti tawh a, June thla tawpah inremna hi tihfel hman tum a ni.
Kum 2007 khan Russia leh Iran hian inremna siamin, Russia-in Iran hnena S-300 system panga, US dollar maktaduai 800 man supply turin an inrem a ni. Mahse Kum 2010 September thla khan khatih laia Russia President Dmitry Medvedev chuan UN Security Council resolution zulzuiin he contract hi a titawp a ni. UNSC resolution chuan Iran hnena ralthuam hralh a khap a ni.
Russia Foregin Minister Sergei Lavrov chuan Iran hnena air defence system hralh khapna an hlih chu Iran chhehvel bial tana thil hlauhthawnawm a nih loh thu a sawi. Lavrov chuan, "S-300 hi defensive weapon ringawt a ni a, eng ram security tan pawh thil hlauhawm a ni lo, Israel tan pawh hlauhthawn tur a awm lo," a ti.