Boko Haram-te'n hmeichhia 2,000 chuang an rubo tawh
Nigeria helpawl, Boko Haram-te chuan nikum kum tir aṭang khan hmeichhia 2,000 chuang an ru bo tawh niin Amnesty International chuan a sawi.
Nikum April 14 khan helpawl hian an ram hmarchhak lam, Borno state-a Chibok khua aṭangin hmeichhe tleirawl 219 an rubo a, hei hi a ruala an ruk bo tam ber ṭum a ni. He thil thleng vang hian khawvel dem an hlawh bakah an mi rukbote chhuah turin nasa takin an phut a ni. Mahse tun thlengin helpawlte hian an mi rukbote hi an la chhuah lo.
Human rights group, Amnesty chuan Islamist helpawlte'n mi an ruk bo chungchang hi mita hmutute leh an rukbo zinga tlanchhuakte sawi aṭangin inrukbona ṭum 38 thlenna document an nei tih a sawi. Report an tihchhuahah, Amnesty chuan, "Ṭum 38-ah hian mi eng zat chiah nge ruk bo an ni tih hriat a har a, mi 2,000 chuang an tling ngei ang," a ti.
Nigeria sipaite chuan nikum April thlaa Chibok aṭanga zirlai hmeichhe rual rukbote chu an awmna hre mah se, heng mite chhanchhuah tuma beih chu an tan pawh a him loh phah zawk nia sawiin chhanchhuah hna an thawk thei rih lo tih an sawi. Nikum May thla khan Boko Haram hian an hmeichhe ruk bote thla lanna video hi an tichhuak a, hetah hian hmeichhe tleirawl 100 vel chu Muslim thuam inbelin, Koran chang an sawirual lai tihlan a ni. Boko Haram hruaitu, Abubakar Shekau chuan tleirawl an rukbote chu Islam-ah inpe vek tawh a, pasal pawh an neihtir tawh hlawm niin a sawi bawk.