Yemen: UN-in Houthi hrekna siam tum

UN Security Council chuan Yemen sorkar laka hel, Houthi helpawlte hrekna tur resolution siam tumin vote lak a tum.

Draft resolution siamah helpawlte hi Yemen khawpui, Sanaa bakah an ram luah dang aṭanga inthiarfihlim tura tiin, an pawl hruaitute hrekna, an account leh thil neih dangte khawih chet theih loh tura hrekna siam a ni bawk. Mahse he resolution hi Russia chuan a veto hmanga a hnawl rin a ni thung.

Resolution siam tur hi thla hmasa aṭanga Saudia Arabia leh Gulf Arab ramte'n Houthi laka beihpui an thlak hnua Security Council-in hma a lakna hmasa ber a ni.

Houthi helho hian Yemen ram tam zawk an la tawh a, lawngchawlh­na hmun pawimawh awmna, Aden khawpui lak leh tumin sorkar sipaite nen an inbei mek a ni.

Tualchhung indona vang hian Yemen mipui tam zawkin harsatna an tawk a, a bikin Aden khawpuia chengte chu pawn chhuak ngam loa hun rei tak an awm tawh avangin ei tur leh damdawi lamte pawh an tlachham ṭan tawh a ni. UN chuan thla hmasa aṭanga inbeihna thleng vang hian mi 600 chuang an thi tawh bakah, mi 2,000 zetin hliam an tuar tawh niin a tarlang.