Donald Trump-a'n beih a tawk leh
US president hlui, kumin inthlana neih tura Republican party candidate, Donald Trump chu a ṭum hnihna atan Pathianni khan Florida-ah thah tuma beih a ni leh.
Donald Trump hi Florida-a Trump Golf Course-a golf a khelh laiin pawn a sir hnim buk aṭanga amah kah tuma silai rawn rawlh lut chu US Secret Service agent-te chuan hmuin an kap nghal a, pawikhawih tumtu hian a silai hi a tlanchhiatsan nghal a, mahse a hnuah an man leh a ni. A bihrukna aṭang hian AK-47-style rifle, backpack pahnih leh GoPro camera te hmuh a ni. FBI chuan kah a tumna aṭang hian Trump hi meter 275 - 455 vela hlaah a awm niin an tarlang.
Trump vengtuten an kah let hnuah pawikhawihtu hi Nissan car dumah a tlan lut lai mi pakhatin hmuin, a motor leh number thla te a lo la hman a ni. Martin County Sheriff Office ah a hriattir nghal a, hemi hmang hian pawikhawih tumtu hi police ten an man thei ta a ni.
Trump Campaign Communications director Steven Cheung chuan Trump a him thu hi a puang nghal a, Trump pawhin a him thu sawiin, 'Ka himin ka ṭha e. Engmahin min dal dawn lo a, ka tlawm ngai dawn lo," tiin a rawn sawi zui ve nghal a ni.
Trump kah tumtu nia sawi an man hi kum 58 mi, Ryan Wesly Routh a ni a,thu zawhfiah mek a ni. Routh hi kum 2002-2010 inkar khan Guilford County, North Carolina-ah pawikhawihna avanga thubuai eng emaw zat siamsak a lo ni tawh nia sawi a ni.
Golf course-a Donald Trump beih tumna hi president Joe Biden leh vice president Kamala Harris pawh hriatir an ni tawh tih White House chuan a sawi. Harris chuan president hlui Donald Trump a him chu lawmawm a tih thu sawiin, US Secret Service leh police-te chu an hnathawh ṭhat avangin a fak bawk.
Kumin July 13 khan Trumph hi Butler, Pennsylvania-a rally a neih laiin kah a lo ni tawh a, hliam a lo tuar tawh a ni. A kaptu, Thomas Matthew Crooks chu FBI in an man nghal a ni.