North Korea foreign minister in Russia tlawh

North Korea foreign minister Choe Son Hui chuan Eurasian Women's Forum leh BRICS Women's Forum, Saint Petersburg-a neih tur hman pui turin Russia a tlawh tih North Korea-a Russian embassy chuan nimin khan a sawi.

"Russia ambassador Alexander Ivanovich Matsegora chuan Pyongyang International Airport-ah NKorea foreign minister Choe Son Hui chu a thlah" tiin Vkontakte social network-ah an tarlang.

Embassy chuan September 18-20 chhunga neihtur, forum-ah hian NKorea minister hian thu a sawi dawn bakah, sawi honaah pawh a tel dawn tih a tarlang tel bawk.

Russia Parliament upper house, Federation Council-a speaker, Valentina Matviyenko chuan June thla khan ram hrang hrang za chuang aiawh palai te chuan he forum hi an hman pui a beisei thu a lo sawi tawh a, "Khawvel ram hrang hrang aiawh tur thleng tam thei ber record chu he Forum hian a thlen theih ngei kan beisei "tiin a sawi a ni.

Russia president Vladimir Putin chuan hun hmasa lamah Forum hi a lo hmanpui tawh ṭhin a, kuminah hian a telpui dawn em tih erawh sorkar lam chuan a la puang lo.

President Putin-a'n North Korea a tlawh ṭuma NKorea hruaitu, KimJong Un nen ram thawhdunna tur inremna an ziah hnuah, ram pahnihte inkar boruak hi a ṭhat phah zual hle a ni. Inremna an ziah zingah hian defence lama thawhdunna tur pawh a tel. Hetih lai hian US leh a thurualpui ramte chuan Russia leh Ukraine indona thleng mekah, NKorea hi Russia pui a,ralthuamte pe ṭhinah a puh a, mahse Russia leh NKorea chuan hei hi an pha nasa hle thung.