Shanghai-ah kum 75 chhunga thlipui na ber a tleh

Shanghai khawchhak lam, Lingang New City-a tuipui kam chu nimin, September 16 zing dar 7:30 vel khan typhoon Bebinca in a nuai tih China Meteorological Aministration chuan a sawi. Hei hi kum 75 chhunga Shanghai-a thlipui tleh nat ber a ni.

Local official-te chuan thlipui tleh dawn vang hian venthawn thilah Pathianni khan Shanghai Metropolitan area-a cheng, mi nuai 4 chuang chu hmun him lamah insawn chhuah tir an ni tih an sawi. Hei bakah Yangtze River hnar lama awm, Chongming District aṭangin mi 9,000 vel sawn chhuah an ni bawk.

Shanghai khawpuia airport lian pahnih chuan flight tam tak an cancel a, rel service pawh ti tawpin, kawngpuite khar a ni bawk. Motor tlan chhuak tan pawh speed limit 40 km/h ah bithliah a ni. Khawpuia cheng, mi mtd 25-te chu pawn chhuak lo turin an ngen bawk a ni.

Thuneitute chuan Bebinca tleh dawn vang hian level sang ber, red alert ti chhuakin, thlipui tleh nat lam hi 151km/h (94 mph) nia record a ni.

Flood control headquarters chuan thlipui tleh kaihhnawiha chhiatna thleng report tam tak an dawn tawh thu sawiin, heng zingah a tam zawk chu thingkung tlu leh billboard tla te a ni.

Shanghai a thlen hmain typhoon Bebinca hian Japan leh Phillippine ramte a nuai hmasa a, thlipui tleh vanga thingkung tluin mi paruk a delh hlum a ni. Bebinca hi khawthlang lam panin,Jiangsu, Zhejiang leh Anhui province lam a nuai leh rin a ni a, ruah nasa taka a sur tel rin a ni bawk.