Russia-in Iran hnena missile a hralh tur Israel-in a ngaimawh

Russia President, Vladimir Putin-an Iran hnena S-300 missile system hralh khapna a hlih tak avangin Iran chuan heng ralthuamte hi a lei thei dawn a, hei hi Israel Prime Minister Benjamin Netanyahu chuan a ngaimawh hle.

Thawhlehni khan Israel PM Netanyahu chuan Russia President Putin hi telephone-a biain, Iran hnena missile defence system hralh a remti ta chuan Iran chhehvel ram himna a tiderthawng tih a hrilh.

Thuchhuah siamin, Israel PM chuan, 'S-300 missile sytem hralh tur hian Iran hi ralthuam tam zawk neih a duhtir phah ang a, Middle East bial himna a tiderthawng thei dawn a ni' a ti.

Netanyahu chuan Russia thutlukna siam chu world power ram paruk leh Iran-in tunhnaia Iran nuclear deal chungchanga inremna an siam rahchhuah nia a ngaih thu a sawi bawk.

US pawhin Russia-in Iran hnenan air defence system supply a tum leh chungchang hi a ngaimawh thu a sawichhuak a, hemirual hian nuclear talk chungchangah ṭha taka an thawhho zel theih a beisei thu a sawi lang bawk. US State Department thupuangtu, Marie Harf chuan Secretary of State John Kerry chuan Russia Minister Sergei Lavrov hnenah President Putin-a thutlukna siam dan ṭha an tih loh thu a hrilh a ni.

Kum 2007 khan Russia hian Iran hi S-300 missile sytem, dollar maktaduai 800 man supply-na turin inremna a siampui a, mahse kum 2010 khan khatihlai President Dmitry Medvedev chuan UN Security Council resolution zulzuiin he contract hi a lo titawp tawh a ni.

Iran chuan Russia-in missile sytem supply a khapna a titawp ta chu lawmawm a tih thu a sawi a, Iran Supreme National Security Council (SNSC) Secretary Ali Shamkhani chuan kumin chhungin Russia aṭang hian air defence system-te hi an dawn hman an beisei thu a sawi.