Malala-in Nigeria hmeichhe rukbote tan lehkha a thawn

Nimin khan Nigeria helpawl, Boko Haram-ten an ram khawchhak lam, Chibok khua aṭanga zirlai hmeichhe tleirawl 200 chuang an rukbo champha vawi khatna a ni. Tun thlengin an zinga a tam zawk chu an chin hriat a la ni lo.

Pakistan tleirawl, Nobel Peace Prize dawngtu, Malala Yousafzai-i chuan nimin khan Nigeria hmeichhe tleirawl rukbote pual hian lehkha a thawn a, englai mahin theih­nghilh an la ni lo a, an chhungte nen hlim taka an inhmuhkhawm leh hma chuan chhanchhuah an nih theihna atan an bei zel dawn tih a sawi.

Yousafzai-i chuan hmeichhe tleirawlte chhanchhuak tur hian Nigeria ram hruaitu leh international community chuan an bei nasa tawk lo nia a ngaih thu a sawilang.

Nimin vek khan Nigeria President thlan thar, Muhammadu Buhari pawhin thu sawiin, hmeichhe tleirawlte hi chhanchhuah an nih theihna turin theihtawp an chhuah zel dawn tih a sawi.