Obama'n terror list aṭanga Cuba paih a remti

US President Barack Obama chuan terrorism sponspor ram list aṭanga Cuba paih rawtna chu a remti niin White House chuan a tarlang.

Tunhnaia US leh Cuba hian an ram inlaichinna siamṭhat dan kawng an zawng mek a, kar hmasa khan Panama City-a Summit of the Americas neih den­chhenin President Obama leh Cuba President Raul Castro-te chu an inkawm a, hei hi kum 50 hnua US leh Cuba President-te hmaichhana an inkawmna hmasa ber a ni. Hemi hma hian telephone-in an lo inbe tawh bawk.

US State Department chuan Cuba ram dinhmunte a zirchian hnuah, President Obama hnenah hian terrorism sponspor list aṭanga paih turin a rawt a ni. State Department chuan list-a Cuba a awm chhan hi Cuba sorkarin Colombia helpawl lian ber, Revolutionary Armed Forces of Colombia (FARC) a thlawp vang niin a sawi.

Terrorism sponspor list aṭang­a paih tura rawtna hi President Obama chuan a thlawp a, a remtih thu hi Congress-ah thlenin anni hian an lo ngaihtuah ve leh ang.

Cuba chuan President Oba­ma'n list aṭanga paih a remti chu lawmawm an tih thu sawiin, a tir aṭang rengin list-ah hian awm lo tur an ni tih a sawi.

Kum 1959-a Cuba revolution aṭang khan US nena an inlaichinna hi a ṭha lo ṭan a ni, ram pahnihte inkar boruak ṭhat loh chhoh dan

1960 : US chuan Cuba nena palai intirh tawnna a titawp a, sumdawnna lamah a hrek nghal bawk

1961 : US chuan Bay of Pigs inva­sion a thlawp a, Cuba hruai­tu Fidel Castro chuan Cuba chu communist ramah puangin, USSR a thawhpui

1962 : US-in a run a hlauh avangin Castro chuan an ramah USSR chu nuclear missile a dah a phalsak.

1980 : Castro-an mipuite khuah­khirhna a hlih lailawk chhungin Cuba mi 125,000 vel chu US-ah an tlanchhia.

1993 : US-in bungrua thawnluh kawngah Cuba hrekna na zawk a siam.

1999 : Cuba naupang Elian Gonzalez chu Florida tuipui kama refugee lawng aṭangin lak a ni a, Florida-a a chhungte hnenah Cuba-a a pa remti lo chungin dah a ni. Hun eng emaw chen court-a buaipui a nih hnuin, US federal agent-te chuan a pa hnena hruai kir turin an la.

2002 : US Under-Secretary of State John Bolton chuan Cuba chu 'axis of evil' tiin a vuah.

2014 : President Obama chuan Cuba nena an inkar boruak siamṭhat tuma a beih tur thu a sawi.