Israel PM-in Hamas leh Hezbollah lakah 'War goals' thar puang

Israel prime minister Benjamin Netanyahu chuan nimin, September 17 khan Hamas leh Hezbolla laka an ram 'war goals' siam belh a puang a, heng zingah hian Israel hmar lama cheng, Hezbollah te beihna avanga tlanchhiate him taka an kir leh theihna tur a tel tih a sawi.

Prime Minister Office in thuchhuah a siamah, "Security cabinet chuan war goal a siam belhah, ram chhung hmar lama cheng tlanchhiate him taka anmahni in ngei an kir lehna tur a telh a ni," a ti.

Hamas firfiakten Israel chhim lam an beih avanga Israel-in Gaza Strip-a Hamas te a beih let hnuah, Lebanon helpawl Hezbollah chuan Hamas te an thlawpna lantirin, Israel hmar lam ramri bulte chu an lo bei zui ve a ni. Hezbollah te beihna avang hian Israel hmar lam ramri hrul khaw hrang hranga cheng, mi sing tel chu hmun him lamah sawnchhuah an ni. An khuate hi rocket hmanga beih a nih vangin a chhe nasa hle.

Israel defence minister Yoav Gallant pawhin Thawhṭanni khan an ram tlawhtu, US palai Amos Hochstein hnenah Israel hmarlama chengte an in leh loa him taka an kir leh theihna tur chuan sipai chakna hmanga an chet a ngai tih a lo hrilh tawh bawk.

Hetih lai hian Hezbollah official-te chuan Gaza Strip-a Hamas leh Israel ten inkahhai an puang thei a nih chuan Israel an beihna an ti tawp ang tiin an sawi.

Gaza Strip-a inkahhai puan a nih theihna hian ram dangte hmalaknain thla eng emaw chen inbiakna neih ni tawh mah se, tun thlengin inremna an la siam thei lo. Nimina US secretary of state, Antony Blinken-a'n Egypt a tlawhah pawh, inkahhai puan chungchang hi an sawiho pawimawh tur zingah an telh a ni. US state department thupuangtu, Matthew Miller chuan US chuan rawtna thar siamin, Hamas mi hren mekte chhuah an ni vek theihna tur te, Palestinian mipuite harsatna tawh mek chhawk zangkhaina tur leh, ramria boruak ṭha leh him siam a nih theihna tur ruahmanna a siam leh mek niin a tarlang.

Israel PM hian US ruahmanna lo siam tawh, inkahhai puanna tura Gaza Strip aṭanga Israel sipai lak chhuah vek rawtna chu a pawm lo a, Egypt-Gaza border-ah Israel sipai dah chhunzawm zel a tum a ni. Ramchhung leh ram pawn aṭangin nawrna nasa tak awm mah se, Netanyahu hian a thutlukna hi a sawhsawn duh lo a, ramria an sipaite dah chhunzawm an nih loh chuan an ram himna a derthawng dawn niin a sawi a ni.