Putin-a'n sipai nuai 1.8 lak belhna tur thupek ti chhuak

Russia president Vladimir Putin chuan an ram sipai atana mi nuai 1.8 lak belhna thupek a ti chhuak a, China dawta sipai ngah ber ram an ni tawh dawn a ni.

Sorkar official website-ah he thupek hi ti chhuakin, December 1 aṭanga lak thar an ni ang. Sipai lak tharte nen hian Russia sipai awm zat hi mtd 2.38 ah a pung chho dawn a, heng zinga mtd 1.5 chu active servicemen an ni ang. Hei hi February 2022-a Russia-in Ukraine a run hnua sipai lak runpui a neih ṭum thumna tur a ni bawk.

Kumin June thla khan Putin chuan Ukraine nen indonaah hian an ram sipai nuai 7 dawn an tel tih a lo sawi tawh a ni. A hmain sipai lak runpui hi ṭum hnih an nei tawh a, mi nuai 1.37 leh nuai 1.7 an lak belh tawh. Hei bakah hian indonaa tel turin reservist nuai 3 chuang lak ni bawkin, hengte hi hlawh ṭha tak tak pek an ni.

Russia-Ukraine indonaah hian ram pahnihte hian a sipaite an chan nasa tawh hle a, mahse sipai thi zat chiah hi an sawi lang lo.

Russia parliament lower house-a defence committee chairman, Andrei Kartapolov chuan an ṭhenawm ramte awmdan thlirin sipai lak belh hi a ṭul niin a sawi. Finland pawhin NATO bloc a zawm tak avangin, an inrina, Russia hmar thlang lamah pawh military unit leh structure tharte siam a ngai dawn a ni, a ti.