Japan-ah kum 65 chung lam mtd 35.25 awm

Japan ramah kum 65 leh a chung lam mi mtd 36.25 awm tling tawhin, khawvela kum upa tamna ram zingah an tel zel.

Nau piang an tlem zel laiin Japan-ah hian kum upa lam an pung chak thung a, Ministry of Internal Affairs and Communications in data a tih chhuah thar ber aṭang hian Japan rama kum 65 leh a chunglam awm zat an ram mipui awm zat aṭanga 29.3% an tling tawh.

Kum 65 chunglam mi mtd 36.25 zingah hian hmeichhia mtd 20.53 an awm a, mipa mtd 15.72 an awm bawk.

Kum upa lam pung zel tana medical leh welfare senso chu Japan sorkar tan pawh buaipui tham a ni tawh a, hetih lai hian nau piang an tlem avangin hnathawk rual, labour force erawh an tlem zel thung. Hei vang hian sorkar pawhin nau piang an pun theihna turin a theih dan angin hma a la chho mek bawk.

Kum 2023 khan kum 65 chung lama hnathawka chhawr hi mi mtd 9.14 vel an awm a, hei hi hnathawktu awm zat aṭanga 13.5% an tling pha a ni.

National Institute of Population and Social Security Research chuan kum 2040-ah Japan rama kum 65 chung lam awm zat chu an ram mipui aṭang 34.8% an tling dawn niin a tarlang. Hnathawk thei rual an tlem zel dawn avangin hnathawktu indaih lohna hi mtd 11 chuang a tling dawn niin a sawi bawk.