Hezbollah-in an pager tipuaktuah Israel puh

Lebanon helpawl, Hezbollah ten inbiak pawhna atana an hman, kuta ken mai theih pager chu Thawhlehni zan khan an ram khawpui, Beirut leh ram chhung hmun dangahte a puak hlawm a, hei vang hian mi pakua thiin hliam 2,800 vel an awm. Hezbollah chuan an pager puak hi Israel thiltih niin a puh.

Iran thlawp, Hezbollah chuan pager hi Hezbollah unit leh institution-a thawkten an hmang a, hetianga an pager hman lai leh an iptea a ah laite a rawn puak vak hi Israel spy agency, Mossad te thiltih ngei a ni tiin, an chhang let dawn tih an sawi. Mahse Israel lam chuan he thil thleng chungchangah hian sawi an la nei lo thung. Thawhlehni zana pager puak hi 5,000 vel a tling nia sawi a ni.

Pager puak vanga hliam tuar zingah hian Lebanon-a Iran ambassador pawh a tel. Hliam tuar zingah mi 200 chu an dinhmun a ṭha lo hle niin Lebanon Health Minsiter chuan a sawi bawk. Hliam tuar tam ber hian an kawng, hmai, mit leh kutah hliam an tuar a, ṭhenkhat chu an kut ṭang hloh phahte pawh an awm.

Hezbollah media office chuan an fighter pariat an thi tih an sawi a, an thihna hmun tak erawh an sawi lang lo, Jerusalem an pan laiin an martar ta a ni, tiin an tarlang. "He thil thlengah hian Israel chuan mawhphurtu pumhlum a ni" tiin, hetianga an chetna hi an chhang let ngei dawn a, beih letna atan hian eng ang pawhin an che thei dawn tih an sawi zui bawk.

Lebanon prime minister Najib Mikati pawhin pager puak chungchangah hian Israel chu mawh puhin, Lebanon ram inrelbawlna palzutna lian tak leh, pawikhawihna nasa tak a ni, a ti. Iran foreign minister Abbas Araghchi chuan Israel chet dan a dem thu a sawi chhuak bawk a ni.

Hetihlai hian Israel ṭhianṭha, US chuan he thilah hian inhnamhnawihna engmah a neih loh thu a sawi nghal a, Iran chu boruak ti sosang zawnga thil ti lo turin a chah nghal.

Hezbollah hian an mobile phone chu Israel lamin an hack sak ṭhin nia sawiin, mobile phone hmang lo turin an member-te chu thu a lo pe tawh a ni. Hei vang hian thu inthawnna atan pager hi an hmang chho a, a technology te hlui zawk mah se thu inthawnte put ruk kawngah a him thei zawk niin an ngai. Pager hmang hian text message chauh a inthawn theih a, a inbiak theih loh a ni. Mahse technology lama sang tak, Israel chuan a rawn hack sak leh ta tho niin an ngai a, pager chhungah hian puak thei thil an lo phum ru vek niin an puh.

Lebanon security lam chuan pager hi Tawa-a hmunpui nei, Gold Apollo siam niin an sawi a, mahse company chuan anmahni siam a ni lo a, an brand hman phalna nei BAC company siam zawk a nih thu an tarlang a, he company hi Europe ami a ni tih an sawi a, an awmna hmun tak erawh an sawi lang lo.