Myanmar sipaiten civil mi 5,350 ti hlum tawh : UN report

UN Human Rights Office (OHCHR) in Myanmar chungchanga report a siam thar ber chu Thawhlehni, September 17, 2024 khan tih chhuah a ni a, Myanmar-a sipai sorkar chu mihring dikna chanvote nasa taka palzutah puhin, tualchhung buaina nasa tak an la hmachhawn zel tih an tarlang.

UN report chuan kum 2021, February thlaa sipaiten civil sorkar thuneihna hnehchhuh a, sorkarna an siam aṭang khan sipaite leh sipai sorkar dodaltute inkarah buaina chhuakin, sipaite kutah civil mi 5,350 an thi tawh. Heng zinga mi 1,800 chu sipaiten an hren laia thi niin, airstrike leh artillery strike hmanga sipaiten an beihnaah mi tam tak an thi a ni. Sipaite kuta thi mi 5,350 zinga mi 2,414 hi April 2023 leh June 2024 inkara thi an ni.

OHCHR thupuangtu, Liz Throssell chuan civil mi 5,350 thah an nih bakah, mi maktaduai 3.3 chuan himna zawngin an in leh lo an tlanchhiatsan tawh a, Myanmar ram mipui zahve chuang chu sipaite tharum thawhna thlente avang hian dinhmun harsa leh rethei takin an khawsa mek bawk a ni, a ti.

Report-ah hian February 1, 2021-a thuneihna an chan aṭang khan sipaite hian civil mi 27,400 vel an man tawh a, military training centre hrang hranga dah an ni tih tlarlan a ni bawk. An mi hrente hi an nghaisa nasa hle nia sawi a ni bawk a, tui leh ei turte an pek ṭhat loh bakah, rul leh ramsa dang hmangtein an tihṭhaih fo a, leicharah an bawhvah tir a; thir, mau, electric wire, motorcycle chain leh hmanraw dang hmangtein an vaw ṭhin a, hei bakah taser, lighter, cigarette leh tui sa in an dep ṭhin bawk niin UN Human Rights Myanmar team hotu, James Rodehaver chuan a sawi bawk.