Khawvel pumah Covid-19 vanga thi mtd 1 chuang tawh

Khawvel pumah Covid-19 hri vanga thi chu nimin thleng khan mi maktaduai khat an chuang tawh.

Nikum December thla khan China-a Wuhan khua aṭangin Covid-19 hri hi a darh ṭan a, he hri leng hi kum khat pawh a vei hmain mi maktaduai khat chuangin an thihpui hman a ni. Worldometers-in a tarlan danin, khawvel pumah hri kai hmuh chhuah tawh hi mi 3,33,19,669 an awm tawh a, heng zinga mi 2,46,42,017 chu enkawl dam an ni tawh thung. Hripui vanga thi hi mi 10,02,524 an tling tawh bawk. 

US chu Covid-19 hri kai tam berna ram leh he hri vanga thi tamna ber ram a la ni chhunzawm zel. Nimin thlenga US-a he hri vanga thi tawh zat hi mi 2,09,453 an ni. India chu hri kai tam lamah pahnihna a

la ni mek bawk a, a dawtah hian Brazil ram awmin, Brazil hi US tih loha Covid-19 vanga thi tam berna ram a ni. 

He hri vanga thi tam berna ram zinga pathumna chu India a ni bawk. Covid-19 hri leng vang hian ram hrang hranga infiamna leh a kaihhnawih te chu ṭhulh lailawk a lo ni tawh a, mahse ram ṭhenkhatah chuan hri leng a ziaawm chhoh avangin infiamnate chu mipui entu awm loa chhunzawm a ni chho ta zel bawk. He hri leng vang hian ram leh ram inkara insumdawn tawnna pawh a khawih buai hle a, hna chan an tam phah a, hun rei tak zirna in hrang hrangte khar a ngaih phah tawh a ni.  Heng bakah hian kawng hrang hrangin Covid-19 hri leng vang hian buaina a awm chho zel a, heng buaina te hi sutkian a nih theih nan leh, hri laka inven theih nan ram hrang hrang hruaitute chuan hma an la mek a ni.

Kar liam ta Inrinni khan World Health Organisation (WHO) chuan Covid-19 vaccine peihfel a nih hmain, khawvel puma Covid-19 vanga thi chu mi maktaduai hnih an tlin hman a rinawm thu a tarlang a, hei vang hian ram hrang hrangten Covid-19 dona kawnga ṭan an lak thar a pawimawh hle tih a tarlang bawk a ni.