London-ah lockdown duh lohna kawngzawh huaihawt

Britain sorkarin hri kai an pun belh zel avang leh,  hri leng thawh hnihna a thlen hlauhthawn avanga ram puma khuahkhirhna a siam thar leh chu duh loin, Inrinni khan London-ah mi tam takin kawng an zawh. 

Trafalgar Square-a anti-lockdown rally huaihawta tel hi mi 10,000 chuang nia sawi an ni a, police-ten hnawhdarh tumin kawngzawhte nen hian an innawr a, officer paliin hliam an tuar a, kawngzawh zinga mi 10 chu man an ni bawk. 

Inrinnia kawngzawh zingah hian conspiracy theorist lar tak Davic Icke pawh a tel. Kawngzawhte chuan coronavirus vaccine an duh lohna thu ziakte pawh an ken a ni. 

Ram chhunga hri inkai chhawng an pun belh zel avangin prime minister Boris Johnson kaihhruai sorkar chuan ram pumah khuahkhirhna khauh zawk a siam thar leh. Mi paruk aia tam punkhawm khap a nih bakah pubs leh restaurant-te chu zan dar 10  hnuah hawn khap a ni bawk.