Holocaust aṭangin engmah kan zir chhuak lo tih Iran-in a lantir: Israel PM
Israel Prime Minister Benjamin Netanyahu chuan Indopui II thlen laia German Nazi-te'n Juda mi maktaduai 6 an thahte hriatrengna ni, April 15-a hmanah thu sawiin, Juda-te suatna 'Holocaust' thleng aṭang khan thil engmah kan la zir chhuak lo a ni tih Iran hian a lantir a ni, a ti.
Benjamin Netanyahu chuan Jerusalem-a Yad Vashem Holocaust memorial-a a thusawinaah he thu hi a sawichhuak a, Iran chu Middle East pum thunun tuma beiah a puh.
"Nazi-te'n khawvel thunun tuma beiin, Juda mite nasa takin an suat a, hetiang bawk hian Iran pawhin Middle East thunun a tum a, inzarpharh a, Juda ram tihchhiat a tum a ni," a ti.
Tun hnaia world power ram paruk leh Iran-te'n Iran nuclear program chungchanga inremna siam an remti chu Israel PM hian nasa takin a lo sawisel tawh a, inremna siam an tum chu Iran-in nuclear ralthuam a siamna tura kawng hawngtu a ni zawk dawn a ni, a ti.
Netanyahu chuan, "Democracy sorkar te'n Indopui II hma khan thil lian tak an lo tisual tawh a, tunah hian a aia nasa tihsual a awm leh ta a ni," tiin, America leh Israel tihchhiat vek duha Iran mipuite au thawm chu world power ramte chuan an haider a ni, a ti.
Juda-te suatna hriatrengna ni-ah hian Israel ram pumah siren ti riin, minute hnih chhung ngawi rengin an ding a ni. Siren rik lai hian kawtthlera motor tlan leh mihring veivakte pawh an ding vek a ni.