UN Yemen palai Jamal Benomar a bang

United Nations Security Council chuan Thawhehni khan Yemen rama Houthi helpawlte'n ralthuam an lakluha hrekna a siam a, hemi hnu hian UN-a Yemen special adviser Jamal Benomar chu a bang.

Jamal Benomar chuan UN Secretary-general Ban Ki-moon hnenah Yemen rama a mission chu tihtawp a hun ta nia a ngaih thu a hrilh a, hemir ual hian a ṭul anga UN puih zel a inhuam thu a sawi bawk.

Benomar hian Yemen special adviser hna hi kum li a thawk a, Yemen mipuite'n an rama democracy kalphung zawm an duhdante pawh a hriatpui vek a ni tiin UN thupuangtu chuan a sawi. "Secretary-general chuan Yemen rama inlungrualna ṭha a awm theihna atana Benomar-a inpeknate chu lawmawm a ti hle a ni," a ti.

Houthi helte hian nikum September thla khan Yemen khawpui, Sanaa chu sorkar kut aṭangin an laksak tawh a, an huang an zauh belh zel bawk. February thla khan Yemen President Abd-Rabbu Mansour Hadi chu pawn chhuak thei loin hun eng emaw chen an hreng a, Hadi hi chhuah anih hnuah Saudi Arabia-ah a tlanchhe zui nghal a ni.