US-in Iraq chhawmdawlna Dollar mtd 200 pe dawn
US President Barack Obama chuan an ram tlawhtu, Iraq Prime Minister Haider al-Abadi chu an ram mipuite chhawmdawlna atan dollar maktaduai 200 pek a tiam.
Iraq PM hian official-a US a tlawh vawikhatna a ni a, President Obama nena an inkawmnaah hian Iraq-a Islamic State (IS) firfiakte beih letna atan ralthuam tam zawk pe tura a dil beisei a nih laiin hemi chungchang hi a sawichhuak lo.
US-in chhawmdawlna a pek tur hi IS firfiakte nen an inbeihna avang himna zawnga tlanchhiate puihna atan hman a ni ang.
President Obama chuan US kaihhruai ṭangrual sipaite puihnain, Iraq sipaite chuan IS firfiakte'n Iraq-a ram an lak zinga hmun li-a ṭhena hmun khat chu lak let a ni tawh tih a sawi. Abadi pawhin ṭangrual sipaite beihpui thlakna te, ralthuam ṭha zawk hmanga Iraq sipaite thuam an ni leh, training ṭha pek an nih chuan firfiakte nawr letna kawngah a pui nasa hle niin a sawi. Hemi rual hian nasa zawka beih a la ngai tih a sawi bawk.