Sewol lawng chesuala thite hriatrengna hun hmang

South Korea, Jindo thliarkara Sewol lawng chesuala mi 304-te thihna thlen champha vawi khatnaah niminah khan an ram chhung hmun hrang hrangah sunna leh hriatrengna hun an hmang. Lawng chesuala thi zinga a tam zawk hi zirlai naupang an ni.

Sewol lawng hian a phurh theih zata bituk aia tam a phur a, a design pawh a ṭha tawk lo nia sawi a ni. He chhiatna thleng hian ram pum a nghawng a, lawng chesuala chuangte chhanchhuah hna thawh kawngah sorkar chu che chak tawk loa puh a nih bakah, safety standard-te ngai pawimawh loa puh a ni bawk.

Hriatrenga hun hi ramchhunga hmun 300 ah hman a ni a, a hmanna lian ber chu Ansan City-ah niin, hei hi zirlai thite school awmna a ni. Ansan city-a school zirlaite hi school trip neiin lawngah hian an chuang a, mahse vanduaina an tawk ta a ni.

Lawng chetsual dan chhuitute chuan lawnga hnathawk zinga pakhat, tawnhriat la nei lo chuan chak takin a khalh a, a lawng design hi a ṭhat tawk loh avang leh, a phurh zawh tawk aia tam a phurh avangin chesualin a pil ta niin an sawi.

Lawnga chuang, nungdama chhanchhuah zinga ṭhenkhat chuan an chetsual hnu hian lawnga thawk zinga pathumte chuan khualzinte an theih anga puiin an thih phah a, midangte erawh chuan puih an tum lo tih an sawi. Lawng captain leh thawktu senior member pathumte chu khualzinte thlahthlamah puhin hun rei tak jail tang tura thiam loh chantir an ni tawh a, thawktu dang 11 pawh man an ni bawk.