Supreme Court hman tumah Trump puh
US President Donald Trump-a'n Supreme Court justice thar a nominate nghal chungchang chu President thlanna neih tura a khingpui tur, Democratic presidential candidate Joe Biden chuan sawisel lehin, Supreme Court chu Obamacare tihbona atana hman tumah a puh.
Trump hian liberal justice Ruth Bader Ginsburg a thih hnuah a hmun ruak luahkhat turin Supreme Court judge atan conservative jurist Amy Coney Barrett a nominate a ni.
Biden chuan hei hi sawiselin, inthlan hmabak mai an ni lai leh hripui leng kara hmanhmawh taka justice thar tur ruat hi Trump leh Republican Party-in Affordable Care Act an paihbo theihna tur remchang nia an ngaih vang a ni, a ti. Senate hnenah Trump-a justice nominee chungchanga confirmation vote lak chu inthlan neih zawh hnua kalpui turin a nawr zui bawk.
Hetih lai hian President Trump chuan Pathiannia interview a neihah, inthlan neih hma ngeiin Senate-in confirmation vote hi a lak tur thu a sawi ve thung. Congress upper house, Senate-ah hian Republican hian member 100 awm aṭangin member 53 a nei a, hei vang hian Republican President nominee Barett pawh hi an pawm ngei rin a ni.
Debate hmaa drug test nei turin Biden phût
Presidential candidate pahnihte hian a ṭum khatna atan hmaichhana debate chu an ram huna Thawhlehni zan hian an nei dawn. Trump chuan debate an neih hmain Biden chu drug test nei turin a phut tih a sawi. Amah pawhin test neih hi a remti tih a sawi bawk.
Presidential debate hmasa ber, Fox News reporter Chris Wallace kaihhruai turah hian Covid-19 restriction avangin a chhimtu mi tlemte chauh tel phalsak an ni dawn a ni. Debate neih tur atana inbuatsaihna pawh kalpui mek niin, drug test chungchang erawh sawilan a ni lo.
Candidate pahnih, kum 74 mi Trump leh kum 77 mi Biden-te hi mimal takin an inbei chho nasa tawh hle. Trump hian vice president hlui Biden hian tunhnaiah a performance tihṭhatna atan damdawi lam a hmang maithei nia a lan thu a sawi a, hei vang hian debate an neih hmain drug test neih hi a phut tih a sawi.
Hetihlai hian Biden chuan Trump hi Nazi propaganda chief Joseph Goebbels nen a khaikhin ve bawk a, debate an neih hunah pawh dawt hmanga a beih vak a rin thu a sawi lawk ve bawk.
Chhiah USD 750 chauh peah Trump puh
US President Donald Trump chu kum 2016-2017 chhung khan federal income tax, US dollar 750 chauh a pe niin Pathiannia The New York Times chhuak chuan a tarlang.
President Trump hian a chhiah pek zat chungchang hi a puangzar ngai lo a, kum 1970 hnua president zingah mipui hriata a chhiah pek zat tarlang ngai lo awmchhun nia sawi a ni. Kum 2016 inthlan dawna a campaign-naah khan billionaire real estate mongul leh sumdawng hlawhtling tak angin campaign mah se, kum 15 kalta chhung khan kum 10 chu federal income tax a pe lo niin chanchinbu hian a tarlang a ni. He report hi kum 20 chuang chhunga Trump leh a company tax record an neih aṭanga siam a nih thu a tarlang bawk.
He report hi Trump chuan White House-a news conference a neihah chhang nghalin, thu dik lo a nih thu a sawi. Trump chuan chhiah a pek ziah thu a sawi a, mahse a pek zat erawh a sawi lang lo. A chhiah pek dan kimchang chu a la puanzar ngei tur thu a sawi a, mahse a hun tur erawh a sawi tel lo.