November-ah G20 Leaders’ Summit nei dawn

Kum 2020 G20 Leaders' Summit chu virtual-in neih a ni dawn a, Saudi Arabia rama Riyadh-ah November 21-22 chhungin neih a ni ang.

He summit neih tur hi Saudi Arabia ramin a vawikhat kaihhruaina tur a ni dawn a, Saudi king, Salman bin Abdulaziz Al Saud chuan  summit hi a kaihruai dawn a ni. Summit-ah hian khawvel economy in ngai a awh theih dan turte sawiho a ni dawn a,  hei bakah hian  Covid-19 dona kawnga hmalak dan turte leh mipuite an him zawk theihna tura ruahmanna ṭha zawk siam dan turte chu sawiho tum a ni bawk. 

G20 ramte hian US dollar vaibelchhe 21 chuang chu Covid-19 dona leh vaccine siamna kawngah pawisa an thawh tawh tih Saudi Arabia's G20 presidency chuan a tarlang. 

G20 ramte hi Argentina, Australia, Brazil, Canada, China, Germany, France, India, Indonesia, Italy, Japan, Mexico, Russian Federation, Saudi Arabia, South Africa, South Korea, Turkey, UK, US leh European Union-te an ni.