Ukraine nena inzawmna siamthat kan duh: Putin
Russia President Vladimir Putin chuan Ukraine nena an inkar boruak ṭha lo chu siamṭha a, inlaichinna ṭha neih leh a duh thu a sawi.
Moscow television-a zawhna leh chhanna hun a hmanah, President Putin chuan Ukraine nena inzawmna siamṭhat dan kawng an zawn tur thu a sawi a, hemi rual hian Ukraine sorkar pawh hun remchang ṭha awm chu bawhpelh lo a, Minsk accord lo siam tawh chu a taka kalpui turin a ngen nghal bawk.
Russia President chuan kumin February thlaa inremna an lo siam tawh chu hmang duh lohah Ukraine a puh a, remna leh muanna a awm theihna tur hun remchang an neihte chu Ukraine chuan vawi tam tak a bawhpelh tawh a ni, a ti. Putin chuan Ukraine ram economy dinhmun siamṭhat pawh Russia chuan a duh tih a sawi.
Ukraine hi sum lamah a dinhmun a ṭha lo hle a, an ram sum dinhmun siamṭha tur chuan kum li chhungin US dollar tluklehdingawn 40 vel a mamawh dawn niin International Monetary Fund (IMF) chuan a tarlang.
Putin chuan Ukraine-in Russia chu a partner pangngai ang taka en a duh thu a sawi a, Ukraine ramah Russia sipai an awm lo tih sawiin, ram pahnihte chu an indo dawn lo tih a sawi bawk. Russia hi Ukraine sorkar laka helte pui a, Ukraine sipaite an beihna kawngah ṭanpui tura ralthuam leh sipaite thawn lutah puh a ni.