Queen Elizabeth-II staff-te an nuar

England lal, Queen Elizabeth-II staff-te chuan an hlawh ennawn a, tihsan sak an nih loh chuan extra-duty an neih ṭhin an thawk tawh dawn lo.

Hnathawktu nuarte hi Windsor Castle, Berkshire-a thawkte an ni a, kum 900 chhunga a vawikhatna atan an hlawha lungawi loh vangin nawrh an huaihawt ṭum khatna a ni.

Extra-duty an neihah hlawh pek belh an nih loh vang hian hnathawkte hian nawrh huaihawt an rawt a, vote an laknaah hnathawktu zinga 84% chuan nawrh hi an thlawp a ni.

Hnathawkte hian Castle tlawhtute hruaikual a, hrilhfiah hna an thawk ṭhin chu an chawlhsan rih a ni.

Windsor Castle-a thawkte hian minimum wage aia tlem pek an ni tih sawiin, kar khatah darkar 36 an thawk a, a thawk tharte chuan kum khatah pound 14,400 hlawhin an ṭan ṭhin.

Warden 76 te chuan hlawh chungchanga an buaina chu Queen Elizabeth-i lakah ni loin, an mahnih chhawrtu Royal Collection Trust lakah a ni tih an sawi. "Queen leh lal chhungkaw lakah chuan kan rinawm reng a, rinawm ni lo ila kan thawk chhunzawm tawh lo ang," an ti.

Castle hi kumtinin tlawhtu mi maktaduai chuang an awm ziah a, he kulh enkawlna atan hian pound maktaduai 17 chuang zet hman a ni ṭhin.