Ram inchuh laiah China-in runway a siam

China chuan South China Sea thliarkara ram inchuh lai, Spratly Island-a Fiery Cross Reef-ah runway a siam.

South China Sea thliarkar hi China, Philippines, Vietnam, Malaysia, Brunei leh Taiwan te ram inchuh lai a ni. Ram dangte chuan China hian dan loin ram buai laiah hian thliarkar a siamchawp a, hei hi sipaite hman theih turin a duang niin an puh.

Fiery Cross Reef-a runway siam thla hi March 23 khan tihchhuah a ni a, hetah hian meter 3,000 a thui runway siam lai a lang a ni. Hei bakah hian Sub Reef-ah air strip pahnihna a siam a nia sawi a ni bawk.

Mahse China chuan a ram chin­ah chiah runway hi a siam niin a sawi a, sipaite hman tur bakah civil mite tana siam a nih thu a sawi.

US Senate Armed Services Committee chairman, Senator John McCain chuan China thiltih dan chu ṭha lo a tih thu sawiin, US President Barack Obama kaihhruai sorkar chuan Asia rama a sipai thuam chakna tura ruahmanna siam a, China avanga rilru nuam lo taka awm Asia ramte nena inzawmna ṭha zawk a siam a ngai a ni, a ti.

McCain chuan, "Eng ram pawh ni se, international water nia ngaiha ram acre 600 laia zaua runway siam a, sipaite hman theih tura a duan chu himna ti­der­thawng thei thil a ni," tiin a sawi.