Sudan inthlanah vote a tla ṭha lo

Sudan ram President leh parliament inthlanpui neih zawh takah vote a tla ṭha lo hle a, vote nei mi maktaduai 13 vel zinga vote thlak chu 30-35% vel chauh an ni.

Inthlan neihpuitu, African Union team hruaitu Olusegun Obasanjo chuan voter zinga tam tak chuan inthlan result tur chu chiang saah an ngaih avangin vote an thlak lo niin a sawi.

Inthlan hi Thawhṭanni aṭang khan neih ṭan a ni a, vote a tlak ṭhat loh avangin Ningani thleng khan vote thlak hun hi pawhsei a ni. Mahse heti chung hian vote hi a tla ṭha chuang lo a ni.

Eptu party liante'n inthlan hi felfai taka kalpui a ni dawn lo tiin an boycott a, hei vang hian kum 25 chhung thuneihna lo chang tawh, President Omar al-Bashir leh a kaihhruai National Congress party chuan ro an rel chhunzawm leh dawn a ni.

Kum 71 mi, al-Bashir hi International Criminal Court chuan a mihringpuite suata puh chungchangah wanted zingah a telh a ni.

Party lian dangte'n inthlan hi an boycott vangin President post chuhpuitute hi hriat hlawh loh tak tak mi 13 an ni.

Vice President Ibrahim Ghandour chuan vote tlak danah sorkar chu a lungawi tawk tih a sawi. Inthlan result hi April 27 hian puan a ni ang.