NKorea-in ballistic missile pathum kapchhuak

North Korea chuan nimin khan tuipuiah ballistic missile pathum a enchhin leh niin US leh South Korea official-te chuan an sawi.

Missile-te hi Hwangju bial aṭanga zing dar 5:45 leh 6:40 inkarah kahchhuah an nih thu South Korea Joint Chiefs of Staff chuan a sawi a, km 500 leh km 600 vel an thlawh tir hnuah an ram khawchhak lam tuipuiah a tla a ni. Heng missile-te hian South Korea ram pum a kap pha dawn niin a sawi bawk.

US chuan missile kahchhuah zinga pahnihte chu short-range Scuds missile niin a sawi a, a pathumna hi mid-range Rodong nia hriat a ni bawk.

UN-in North Korea hi nuclear emaw, ballistic missile technology lam emaw reng reng a enchhin a khap a, mahse khap a ni chung hian NKorea hian a enchhin lui reng tho a ni.

South Korea Prime Minister Hwang Kyo-ah chuan tunhma lamin North hian missile hi a enchhin ngai vak lo a, mahse kumin chuan a enchhin ngun ta hle niin a sawi. Hun reilo chhungin an ram himna chu a derthawng chak hle a ni, a ti.

Tunhnaiah US leh South Kora-in Korean Peninsula-ah Terminal High Altitude Area Defence (THAAD) anti-missile system dah an tum tih an sawi a, hei hian NKorea a ti thinur hle a, an dahna hmun leh a hun an tihfel chuan an theih angin an chhang let dawn tih a sawi. China pawhin South Korea ram china THAAD system dah tum hi a sawisel. THAAD system an dah tur thu an sawi hnu hian, US chuan North Korea ram hruaitu lu ber Kim Jong-Un chu an ram chhunga mihring dikna chanvo palzutnaa mawhphurtu berah puhin mimala hrekna tur a siam tawh bawk a ni.