Germany-ah refugee-in hreiin rel chuangte bei

Germany chhim lam, Wuerzburg-ah Afghan refugee rawlthar pakhatin hrei leh chem nen rel-a chuangte a bei a, mi pali-in hliam an tuar. Pawikhawihtu hi police-ten an kaphlum nghal a ni.

Bavarioan Interior Minister Joachim Herrmann chuan rel beitu hi pawi a khawih hnua a tlanchhiat tum chu police-ten an kaphlum niin a sawi a, mi pali hliam tuar zinga pakhat chu Hong Kong aṭanga kal an ni a, rel-a chuang midang 14-te pawh an chiai nasat avangin enkawl an ngai bawk.

Hermann chuan pawikhawihtu hi Afghan refugee, kum 17 mi niin a sawi a, Ochsenfurt khuaa cheng niin a sawi. Wurzburg an thlen velah Thawhṭanni zan dar 9:15 vel khan a hmanraw ken chuan rel-a chuangte a bei ta mai niin a sawi a, a beih chhan hriat a ni lo.

Kumin May thla khan Munich khawpui bula rel station-ah mi pakhatin chem nen mipui awmkhawm≠te a lo bei tawh bawk a, mi pakhat vithlumin mi dang pathumin hliam an tuar a ni. Pawikhawihtu hi man niin, pyschiatric hospital-ah enkawl a ni a, thuneitute chuan firfiak pawl nena inzawmna a nei lo niin an sawi.

Thuneitute chuan pawikhawihtu bungraw zingah hian Islamic State (IS) firfiak pawl flag, kuta siam an hmu tih an sawi. Finfiahna awm rih lo mah se, he pawikhawihnaah hian Islam firfiakte an inrawlh mai theih thu interior ministry thupuangtu chuan a sawi.