China-a hri leng a darh chak

China rama hri leng  chu a dark chak hle a, ni hnih chhungin a vei thar mi 139 zet hmuhchhuah hman a ni. Hri vei zat hmuchhuah tawh hi mi 200 an tling tawh a, an zinga pathum chu thawk lama harsatna an neih avangin an thi tawh a ni.  

He hri leng mek hi nikum December thla khan Wuhan khuaah hmuhchhuah hmasak ber niin, khawpui lian dangah a darh tawh a ni. China khawpui, Beijing-ah pawh hri vei hi mi pa­hnih hmuhchhuah an ni. China hian Lunar New Year holiday an hman dawn avangin he hun hmang tura haw leh zin tum hi an tam hle a, hei vang hian he hrileng hi a darh nasat a hlauhthawn awm hle. Thailand leh Japan-ah pawh hri vei hi hmuh an ni tawh a, nimin khan South Korea-ah pawh mi pakhatin a vei tih hmuh­chhuah a ni leh bawk. 

Health official-te chuan Wuhan-a hri leng hi coronavirus chi thar niin an sawi a, a hmaa hetiang hri hi mihringin an vei awm hriat a la ni lo. A veite hian thawk lamah harsatna te neiin, khawsik leh khuh te an nei tel bawk. Mahse he hri leng hi eng hri chiah nge hriatchian a la ni lo a, a darh theih dan pawh hriat chian a la ni lo bawk. Official-te chuan mipuite chu sa leh artui ei turte hmin ṭha taka chhum turin an chah.China National Health Commission chuan hrileng mek hi ven theih leh thu­nuntheih niin an sawi a, mihring leh mihring aṭanga inkaichhawn chu hriat la ni lo mah se, fimkhur turin an chah.