Republican Covention neihnaah rally huaihawt

US Republican Party chuan July 18 aṭang khan Cleveland, Ohio-ah an Republican National Convention an hmang ṭan a, ni li chhung a awh ang.

Party Convention-ah hian kumin November 8-a US President thlanna neih turah an party nominee atan Donald Trump puan a ni dawn a ni.

Convention ṭanni hian Cleveland-ah Donald Trump thlawptu leh duhlotuten a hran ve vein rally an huaihawt a, boruak duhawm lo thleng erawh a awm lo.

Republican party member zingah party prsident candidate atana Trump duh lotu an la tam a, hei vang hian party nomination rule thlak an phut a, delegate-te chuan Trump nilo midang an thlan phalsak turin an ti. Mahse hei hi party hruaitute chuan an thil phut hi hnawlsakin, an kalphung siamṭhat duhtute chuan thlawptu an ngah tawk lo niin an sawi.

Donald Trump-a nupui, Melanie Trump chuan convention ṭan zan hian thu a sawi bawk a, mahse a thusawi
ṭhenkhat chu kum 2008-a Democratic convention-a Barack Obama nupui, Michelle Obama thusawi leh ṭawngkam hman ang chiah a nih avangin sawizui a hlawh hle.

Convention ṭan zan hian thupui atan 'Make America Safe Again' tih hman a ni a, thusawitute chuan an hmangaih tak takte sipai ṭan laia hmelma kuta an thih dan te, US-a dan loa pemlutte kuta an thih dante an sawichhuak a, an ram himna pawimawhzia te an sawichhuak a ni. Demo≠cratic Party president candiate tur, Hillary Clinton-in Secretary of State hna a chelh laia Benghazi, Libya rama America mite beih an nih dante pawh an sawilang bawk.

Democratic Party chuan karleh khian Philadephia-ah convention an nei ve dawn a, he hunah hian party president atan Hillary Clinton-i puan a ni ang.