Mexico President-in ngaihdam a dil

Mexico President Enrique Pena Nieto chuan kum hnih liamtaa a nupuiin sorkar contractor hnen aṭanga dollar maktaduai sarih man in a lei avangin an ram mipuite hnenah ngaihdam a dil.

President Nieto hian an rama eirukna hluar lutuk tihbo tumin theihtawp chhuah a tum thu a sawi a, a nupui thil lo tih chuan mipuiten president leh sorkar an rinna a tichhe thei a ni, a ti.

Nieto-a party, PRI hi tunhnaia local election neihah a che ṭha lo hle.

Sorkar contractor, Grupa Higa hnena aṭanga luxury home an lei avang hian President-te nupa hian sawisel an tawk nasa hle a, mahse a nupui Angelica Rivera chuan thil tih dik loh a neih loh thu leh, in chu lemchan aṭanga a sum hlawh chhuah liau liau aṭanga a lei niin a sawi a ni. Mahse a hnuah a in lei hi a pe kir leh.

Pena Nieto-a finance minsiter pawhin contractor ngai hnen aṭang hian in a lei bawk a, sorkar chuan hei hi chhui chiangin thil dik lo a awm lo niin a sawi.

President Nieto chuan eiruk dona tur bill thar siam chu Thawhṭanni khan Mexico City-a National Palace-ah a puang nghal. He dan thar hnuaiah hian sorkar hnathawkte chu chhiah an pek dan kimchang te, an hausakna leh kawng danga hlawkna an neih te tlangzarh vek tura tih an ni. President chuan dan thar an siam hian mipuiten sorkarah rinna an nghah ngam phah ngei a beisei thu a sawi a, dan zawm lote leh palzutte chu an dim dawn lo tih a sawi bawk.