Israel Defence Minister-in indona bi thar ṭan thu a puang

Israel defence minister Yoav Gallant chuan Nilaini, September 19 khan indona an hmachhawn meka a bi thar ṭan a nih thu puangin, an ram hmar lam aṭanga beitu, Lebanon-a Hezbollah helpawl lamah insawrbing chhoh a ni dawn tih a sawi.

Israel sipaite hmaa thu a sawinaah Gallant chuan he thu hi a sawi chhuak a, mahse Lebanon-a Hezbollah mi leh sate inbiak pawhna atana an hman, electronic device, pager puak vak vak chungchang erawh a sawilang lo. Hezbollah chuan pager tipuaktuah hian Israel hi an puh a ni.

Gallant chuan Israel sipai leh security agency-te fakin, hna an thawk ṭha hle a ni, a ti. Gaza Strip-a Hamas firfiakte nen thla tam tak an indo hnuah, Israel sipaite chuan an ram hmar lamah hma a la chho tawh dawn tih a sawi. "Tunah chuan indo bi thar kan ṭan leh ta; huaisenna, tumruhna leh dawhtheihna nasa tak a ngai dawn a ni," a ti.

Israel hian Lebanon nena an inrina lamah sipai a dah belh mek a, tunkarah army 98th division dah tharin, an zingah hian sipai sang chuang leh paratrooper infantry unit bakah artillery leh elite commando force te pawh an tel. Israel sorkar hian Lebanon ram chhunga beihpui thlak tur chungchangah thutlukna an la siam lo a, mahse Hezbollah te chet dan azirin hma a lak chhoh rin a ni.

August thlaa Israeli Democracy Institute-in mipui ngaihdan a lakah khan, Israel mipui zinga 67% chuan Hezbollah chu na taka chhan let an duh thu an sawi a, 46% chuan Lebanon ram chhunga Hezbollah hmun hma te chu bei se an duh thu an sawi.

Hezbollah-in anti-tank missile in Israel kap

Lebanon-a pager puak vak vanga mi 12 thi, mi 3,000 dawnin hliam an tawrh hnuah, Hezbollah chuan Israel chu anti-tank missile in an kap let ve nghal.

Pager tipuaktua puh an nih chungchangah Israel lam hian sawi engmah a nei lo a, an tih a nih leh nih loh pawh an sawilang lo. Mahse Hezbollah chuan Israel tih ngei nia puhin, an chhan let tur thu pawh an lo sawi tawh a ni. Lebanon chhim lam aṭanga anti-tank missile kah chhuah hian Upper Galilee-a Menara bul fuhin, hliam tuar an awm thu Israel media chuan an tarlang a, a zat tak erawh an sawilang lo.