Canada-in international student phalna pek zat ti tlem

Canada prime minister Justin Trudeau chuan kumina an rama international student lut tura phalna an pek chu kum hmasa lam aiin 35% in an ti tlem tawh a, nakkumah 10% in tih tlem belh leh a ni dawn tih an ram huna Nilaini zan khan a sawi.

Canada sorkar hian an rama pem lut tam lutuk chu khuahkhirhna siam tumin hma a la mek a, ram dang zirlai lut tur tih tlem hi an hmalakna pakhat zingah a tel a ni. Ram dang aṭanga pem lut pung zel hian an ram mi tan harsatna hrang hrang a thlen a, a nghawng tam tak zingah hian in luah tur, hna thawh tur leh social service te pawh a tel a ni.

Sorkar chuan international student, Canada-a lehkha zir tura luh phalsak zat chu kum 2025-ah 437,000-ah bithliah a tum a ni. Kumina permit an pek chhuah hi 485,000 niin, kum 2023 khan mi 500,000 chuang hnenah permit hi an pe a ni. International student awm thei zat tih tlem bakah hian, an nupui/pasal te hnena hna thawh phalna, work permit pek ṭhin pawh khuahkhirhna thar siam an tum bawk.

Globe and Mail from Immigration, Refugees and Citizenship Canada in a tarlan danin, Canada-a international student 200,000 chuangte work permit chu nakkum 2025 kumtawp lamah a thi tawh dawn. Sorkarin immigration policy khauh zawk a siam tak avangin heng zirlaite tan pawh hian permanent residency permit hmuh a harsa tawh dawn hle a ni. Postgraduate work permits (PGWP) hi international student, Canada college leh university aṭanga diploma leh degree zo tawhte tan thla kua aṭanga kum thum thleng atan te pek an ni ṭhin.