UN General Assembly : Palestinian ram a luah titawp turin Israel phut

United Nations General Assembly chuan Palestinian duan, Israel-in dan kalha Palestinian ram a luahsak chu thla 12 chhunga ti tawp a, chhuahsan tura phutna non-binding resolution a pawm.

He resolution thlawp lamah hian UN member ram 124 ten an vote a, a thlawp lo lamah vote 14 tlain, vote thlak lo ram 43 an awm bawk. Resolution hi Palestinian lam duan ni mah se, non-member observer state a nih avangin vote a thlak ve thei lo thung.

Palestinian ambassador chuan resolution-a vote lak a ni chu an zalenna leh dikna chanvo sualna kawnga hma lakna pawimawh tak a ni a ti a, mahse Israel palai chuan palaina hmanga firfiak zawnga chetna a ni, a ti.

Non-binding resolution hi ngaihdan leh duhdan puan chhuahna a ni a, dan hmanga kengkawh tura nawr theih erawh a ni lo thung. A taka kalpui kher tura tih theih pawh a ni lo a ni.

Israel hian 1967 indona thlen hnua Palestinian ram a luah, West Bank leh East Jerusalem-ah hian Judate chenna tur in nuai 7 vel a sak sak tawh a ni. International Court of Justice (ICJ)-a judge 15 awmna panel chuan, Israel-in Palestinian ram a luahsak reng hi dan kalh a ni tiin, hei hi a ti tawp thuai tur a ni a, heng hmuna Juda mi chengte chu a sawn chhuak vek tur a ni, a ti ve bawk.

Mahse Israel prime minister Benjamin Netanyahu chuan court chu dawt thu hmanga thutlukna siamah puh letin, Juda mite chu anmahni ram ngeiah mi ram luahsak an ni ngai lo, a ti.