Republican party-in President nominee puang ta

Kumin November thlaa US President thlanna neih turah Republican party chuan official-in an party nominee atan Donald Trump a puang ta.

Republic National Convention neih mekah, Thawhlehni zan khan Donald Trump-a fapa, Donald Trump Jr. chuan a pa chu party president candidate a nih tur thu hi a puang a ni. Trump hian nomination a pawm thu hi Ningani-a thu a sawi hunah a sawi tel nghal rin a ni. Hemi hunah hian America mipuite tana a hmathlir neihte puan nghal a tiam bawk.

Party president candidate inchuhnaah hian thla hnih dawn liamtaah khan Trump hi a chak dawn tih a lo chiang tawh a ni. Official-a party nominee atana puan a ni chu lawmawm a tih thu leh, a inchhuan thu Trump chuan a sawi a, delegate-te hnenah lawmthu a hrilh a ni.

Sumdawn hausa tawntaw, Donald Trump hi politics lamah hnuhma la nei lo a ni. President candidate a chuh ṭum khatnaah party nominee a ni thei chu a tana ni chhinchhiah tlak leh hlu tak a nih thu a sawi. November thlaa US President thlan hunah pawh an chak ngei tur thu a sawi bawk.

Trump chuan a thawhpui tur, vice president atana a thlan Indiana Governor Mike Pence pawh fakin, mi ropui tak a nih thu a sawi a, vice president ṭha tak a ni dawn a ni, a ti.

Party candidate chuha an campaign laia a thusawi ṭhenkhat avangin Republican party chhungah ngei pawh Trump duhlotu hi an awm a, an rama Muslim luh khapna siam a rawt te, Mexico nena an ramri-a daidanna bang siam a rawtte chuan beihzui a hlawh hle. Convention neihna hmun, Cleveland-ah pawh Trump duhlotute hian kawngzawhte an huaihawt a ni.

Mahse tunhnaia mipuite ngaihdan lakah, Trump hian Democratic candidate tur, Hillary Clinton-i a hnaih chak hle. RealClearPolitics in mipui ngaihdan lak hnuhnung ber result a tihchhuahah, an ram mipui 43.8% in President atan Clinton-in an duh tih an sawi a, Trump duhtu hi 41.1% an ni. June thla khan Trump hian point 5 chuang zetin Clinton-i a um pha lo a, April thlaah phei chuan Clinton-i point 10 chuangin a sang zawk a ni.

ProjectFiveThirtyEight pawhin candidate pahnihte inthlauhna hi point 3 chauh niin a tarlang bawk a, mahse convention lai hian point hi a sang chak a, a hnuah a la danglam mai thei niin a sawi.