Turkey-ah emergency puang

Turkey President Recep Tayyip Erdogan chuan a kaihhruai sorkar paihthlak tuma beih a nih hnuah, an ram pumah thla thum chhung atan emergency a puang.

Nilaini zana TV kal≠tlanga an ram mipuite hnena thuchah a sawiah, President Erdogan chuan national security council member-te nen meeting an neih hnuah emergency puan hi an rel niin a sawi. Sipai chakna hmanga sorkar paihthlak tuma an beihnaa firfiak pawl inhnamhnawih zawng zawngte thenfai an nih theihna turin emergency puan hi a ṭul niin a sawi. An ram sipai chhunga thil dik lo inphumte pawh thenfai vek a nih tur thu a sawi.

Erdogan chuan sipai chakna hmanga sorkar paihthlak tumna chu a la tawp fel mai a rin loh thu a lo sawi tawh a, hei vang hian sorkar beihnaa inhnamhnawiha rinhlelhte chu dapchhuah chhunzawm zel a ni dawn tih a sawi a ni.

Turkey ram danpui chuan state of emergency hi thla ruk chin puan a phal a, pawhsei theih a ni bawk. Emergency hnuaiah hian President hian thuneihna sang zawk a nei a, curfew puan theih a ni a, mipui punkhawm leh nawrh huaihawt pawh khap theih a ni bawk.

Emergency hnuaiah hian media lam pawh khuahkhirh theih an ni bawk a, security mi leh sate chuan mimal, motor leh in leh lo te an dap thei a ni. Mahse interior ministry chuan emergency puan hian civil mite a nghawng buai dawn loh thu a sawi.

Kum 1987 khan an ram chhimchhak lam, Kurdish hel leh sipaite inbeihna bialah emergency hi puan a ni tawh bawk a, pawhsei zel niin kum 2002 khan hlih a ni chauh a ni.