Britain PM May-in Germany a tlawh

Britain Prime Minister thar Theresa May chu Nilaini khan Germany-ah a zin a, German Chancellor Angela Merkel hmuin joint news conference an buatsaih. May-i hi PM atana lakluh a nih hnua rampawn lama a zinchhuahna hmasa ber a ni.

June 23-a Britain mipuiten vote an lakah, European Union aṭanga inlakhran duh, Brexit lam an chak avangin David Cameron chu prime minister a nihna aṭangin a bang a, amah thlaktu turin Theresa May-i thlan a ni.

May-i chuan EU aṭanga inlakhran chungchang inbiakna chu ṭan mai an tum lo tih a sawi a, inbuatsaihan hun ṭha tak an mamawh avangin kuminah inbiakna hi neih ṭan hman beisei a nih loh thu a sawi. EU ramte nena inkungkaihna ṭha leh nghet neih chu Britain tum ber a ni, a ti.

Prime Minister Office chuan May-i hian European Council President Donald Tusk-a hnenah EU member-ten thla ruk dana president nihna an inchelh chhawk ṭhinah kum 2017 kum chanve hnu lama Britain hun a thlenah pawh president dinhmun hi an chelh dawn lo thu a hrilh tawh niin a sawi. Mahse May-i chuan Britain hian EU hi a chhuahsan fel hma chuan member nghet tak a la ni reng dawn tih a sawi.

PM May-i hian nimin khan Paris lam a pan leh a, France President Francois Hollande a hmu leh bawk. Ram hruaitu pahnihte hian EU chungchang bakah, kar hmasaa Nice khawpuia pawikhawihna rapthlak tak thleng chungchangte an sawi dun a ni.