Trump-an Republican nomination a pawm America ram him leh muanawm zawka siam a tiam

Republican National Convention-in kumin November thlaa US President thlan tura party official candidate atana Donald Trump a rawtna chu Trump chuan a pawm ta.

Cleveland-a party convention neih tawp ni, Ningani khan Trump chuan US president candidate tura party rawtna chu a pawm thu a puang a, mipuiten dingin an lo lawm a ni. Republican party president candidate a pawm hnua thu a sawi hmasak berah, Donald Trump chuan President atana thlan tlin a nih chuan a foreign policy-ah America mite chu a dah pawimawh hmasa ber dawn tih mipui pungkhawmte a hrilh. "Kan khingpuite nena kan in an lohna tur chu keini chuan America hi a hmasa berah kan dah dawn a ni" tiin, dan leh thupek kenkawh duh mi candidate a ni tih sawiin, rim taka hnathawk ṭhinte chawikan a tum thu a sawi bawk. Hna thar tam tak siam a, an ram hausakna nasa taka tihpun a tiam a ni.

Trump chuan an ram chhunga pawikhawihna thlentu leh dan loa pem lutte chungah dan khauh taka chet a tum thu a sawi a, nakkum January 20-a president thar lakluh a nih aṭangin an rama pawikhawihna leh tharum thawhna thleng ṭhinte chu tihtawp a ni dawn a ni, a ti.

Islam firfiak te, dan loa pem lutte leh dan kalha sumdawnna kalpui ṭhinte chuan America ram himna a tiderthawng a ni tiin, Trump chuan ram him leh muanawmah an siam nawn leh dawn tih a sawi. Dan kalha an ram lut ṭhin te, misual rual leh ruihhlo tawlhru ṭhinte tihtawp nan ramriah daidanna bang a siam tur thu a sawi bawk.

Trump chuan Democratic candidate tur, Hillary Clinton-i chu na takin a bei zui nghal a, Clinton-i chu Islamic State (IS) firfiak hluar chhanah puhin, an ramah Syrian refugee sing tel lakluh tumah a puh bawk. Clinton-in secretary of state hna a chelh laiin thihna, chhiatna leh firfiaka chetna a thleng nasa tih a sawi a, Iraq, Libya, Egypt leh Syria-a a policy kalpui dan chuan boruak a tichhe zual a ni, a ti.